Luke 20

Wamp Mbᵾ Ndi Jisas Waldᵾk Nim Ronduⱡ Ei Nam Ndi Ngurum Nᵾtᵾng

1Wote ui ti kᵾn, Jisas ndi, manga wingti ou nila, wamp mbᵾ ik mbo endpa, Rᵾnang lk Kai mbᵾ nga ik puⱡ mbᵾ, nimba ngumba murum. Ni kᵾn, wu pris kuimbal mat kᵾn, mi ik mbo wu na, manga wingti rᵾp wu mat kunda, Jisas murum nila orung. 2Wote, wu mat ndi, Jisas kundᵾk, nᵾk mel, “Nim ronduⱡ nant ei nga, tek molkᵾn uⱡ mbᵾ en? Nam ndi, nim ronduⱡ ngᵾⱡnga, uⱡ mbᵾ en ei, tᵾn kundkᵾn nin ka!” nᵾtᵾng. 3Wote Jisas ndi, ik nᵾtᵾng ni, punt ropa nimba mel, “Na ndi, enim ik ti waldᵾp nᵾnt ei, na kundᵾk nᵾi! Unt Jon ndi, wamp nu tinditim uⱡ ei, Got nga muⱡ ila uⱡ ei, muna mᵾi kona wamp nga uⱡ ei nda?” nitim. 5Wote, wu nimbᵾ ndi, en enim ik palk nᵾk mel, “Tᵾn ndi, Got nga muⱡ kona uⱡ ei, nimᵾn ndam, wote Jisas ndi, tᵾn kundpa, nimba mel, ‘Enim nambuⱡ emel, Jon nga ik ei, mondᵾk pili napᵾtmᵾn nimba.’ 6Wote tᵾn ndi, ‘Mᵾi kona wamp nga uⱡ ti nimᵾn ndam,’ wamp mbᵾ ndi pora, ik ei pilik kᵾn, tᵾn ku ndi ru-ing. Nambuⱡ emel, wamp mbᵾ ndi, Jon ei, painui wu ti nᵾk pᵾtmᵾn,’” nᵾtᵾng. 7Uⱡ ei nga pilik kᵾn, Jisas nga nitim ik ni, punt rok nᵾk mel, “Jon wamp nu tinditim uⱡ ei, kona nant orunga kandpa titim ei, tᵾn pili napᵾtmᵾn,” nᵾtᵾng. 8Wote Jisas ndi, wu nimbᵾ, kundpa nimba mel, “Enim ninmin uⱡ ei mel ku, na nga ronduⱡ tep moⱡᵾp, kongun etᵾp et uⱡ mbᵾ, enim kundᵾp ni nᵾnimp mon ku!” nitim.

Wain Pana Rᵾp Wu Kit Mat Nga Ik Ek

9Wote Jisas ndi, ik ek ti ropa, wamp mbᵾ, kundpa nimba mel, “Wu ti ndi, nde wain pana ti raⱡpa pendpa kᵾn, wu mat ndi, kongun etᵾk ku moni tᵾk, elim nga mat tᵾndᵾk, teing nimba ngumba pendpa, mang kona ila wak ropa, kona elpa tila mba, ui ruⱡ etpa murum. 10Wote, wain mong ranggᵾk ting ui ei kᵾn, elim nga wain pana ila, elim wain mong mat ranggᵾk ngeing nimba kongun wu ti, tᵾpa mundrum. Wote, wain pana ila morung wu nimbᵾ ndi, kongun wu ni, tᵾmbᵾⱡ rok, pep rorung ila wu ni, kelpa wei yant urum. 11Wote, elim nga kongun wu ti, ku tᵾpa mundrum ila urum. Wu ni, i ku etᵾk rok, kit mondᵾk, makrᵾk mundrᵾng ila, kelpa wei yant urum. 12Wote, elim nga kongun wu ti, ku tᵾpa mundrum ila urum. Wu ni, rok kit mondᵾk, tᵾk ekit kundrung. 13Wote, wain pana puⱡ wu ni ndi, elim nimba mel, ‘Akup na nambuⱡ ti, itimp nda? Na nga kang wu numan ngur ei mint, tᵾp mundamba kᵾn, wu ei nga nim ik ei, tᵾk ou nduk, kum tek piling nᵾmp pᵾnt!’ nitim. 14Wote, wain pana rᵾp etᵾng wu nimbᵾ ndi, kandrᵾng mel, kangᵾm wu ni urum ila, en enim ik mat nᵾk mel, ‘Wain pana ei, kang wu ei ndi moⱡpa, wote tᵾmba uⱡ ei mon. Tᵾn ndi, wu ei rop kondpᵾn, wain pana ei tᵾndᵾn ndi, rᵾp itᵾmin,’ nᵾtᵾng. 15Wote, wu nimbᵾ ndi, kang wu ni, wain pana nila rok, tᵾk ekit nduk, wote rok kondrung. Wote, wain pana puⱡ wu ei ndi, wu mbᵾ kᵾn, namba uⱡ ti etmba nda, nimba? Jisas ndi, wamp morung mbᵾ, waldpa nimba mel, “Puⱡ wu ei ndi, wain pana rᵾp wu mbᵾ, ropa kondpa kᵾn, wote wain pana mbᵾ tᵾpa, wu mat elpa rᵾp iteing nimba ngumba,” nitim. Wamp nimbᵾ ndi, Jisas nga nitim ik ni, pilik nᵾk mel, “Uⱡ ei mel kapⱡa iti natᵾmba!” nᵾtᵾng. 17Wote Jisas ndi, wamp nimbᵾ, kandpa kᵾn, nimba mel, “Enim mon nᵾng ndam, wote Got nga Buk Wingti ila ik morum kᵾⱡ nga puⱡ ei, etᵾk ning mel nant?

‘Manga rᵾki wamp mbᵾ ndi, nde ti, kit nᵾk, wak rok mundᵾk, ketᵾng nde ni ndi, akup manga ei, ambuⱡpa ronduⱡ mundpa morum,’ nᵾtᵾm.
18Wote, wamp nam ti, ku pol ila tᵾpa kawa ndupa, rom ndam, wamp ei, ondpa kel kel etmba. Wote ku ei ndi, mana omba wamp ti, rom ndam, wamp ei ropa, nem nem ndupa tᵾmba,” nitim. 19Wote, mi ik mbo wu na, wu pris na mbᵾ molk pᵾtᵾng mel, Jisas ndi, ik ek ropa nitim ei, en enim kundpa nitim. Nambuⱡ emel, enim pilik kᵾn, Jisas tᵾpᵾn imp muⱡmin nᵾk pᵾtᵾng. Ni wote, wamp mbᵾ nga mundmong endᵾtᵾng.

Ku Moni Takis Ngurmin Uⱡ Ei Nga Jisas Waldᵾtᵾng

20Ni kᵾn, Jisas nga itim uⱡ mbᵾ, tᵾk kongundᵾk rᵾp etᵾk kᵾn, wu mat kandᵾk tᵾk, Jisas nga itim uⱡ mbᵾ, tᵾk mundeing nᵾk tᵾk mundrᵾng. Wu kit mbᵾ ndi, kun kai ralk molk kᵾn, Jisas ik mat nimba ⱡawa tangga, imp moⱡpᵾn wu gapman kuimbal ei nga, kot endangga nᵾk etᵾng. 21Wote, wu nimbᵾ ndi, Jisas ni, waldᵾk nᵾk mel, “Ik mbo wu ye! Tᵾn ndi, pᵾnmᵾn ei, nim ndi, wamp mbᵾ ik kun kai mat mint kundkᵾn ni, kun en. Wote nim ndi, wamp nuim mbᵾ nga mundmong indi nandᵾn, mon. Nim ndi, Got nga ik kupa petᵾm mbᵾ mel, wamp ik mbo endᵾn. 22Akup nim ndi, namba nᵾkᵾn pᵾn? Tᵾn ndi, wu nuim mumuk Sisa ku moni takis nguimin uⱡ ei, kapⱡa muna mon, nda?” nᵾtᵾng. 23Wote, wu mbᵾ nga kol rok nᵾtᵾng ik ni, Jisas ndi, pilpa pora ndupa kᵾn, nimba mel, “Ku moni ti na, tᵾk ora ndᵾi! Wamp kuimp keta ti kᵾn, mbi kᵾn morum ei, wamp nam nga nda?” nitim. Ni kᵾn, wamp mbᵾ ndi, ik punt rok, nᵾk mel, “Wu nuim mumuk Sisa nga kuimp keta morum,” nᵾtᵾng. 25Wote Jisas ndi, wamp mbᵾ, kundpa nimba mel, “Enim ndi, Sisa nga mel mbᵾ kandᵾk kᵾn, Sisa ngᵾk, wote Got nga mel mbᵾ kandᵾk, Got ngᵾk itᵾi!” nitim. 26Jisas nga punt ropa nitim ik ni ndi, wu mbᵾ nga numan orunga roⱡnga, wamp morung ni kᵾⱡ ndi, Jisas imp muⱡing ei nga, uⱡ ⱡawa ti kandᵾk, ti natᵾk kᵾn, ik ti ni nandᵾtᵾng.

Wamp Kolk Tikil Rormᵾn Uⱡ Ei nga Jisas Waldᵾtᵾng

27Wote, Sarusi wu rᵾⱡaip mat, Jisas murum kona nila orung. (Wu mbᵾ ndi, wamp korung nimbᵾ, ⱡoprᵾk yant ui nᵾwing, nᵾtmᵾn.) 28Wu nimbᵾ ndi, Jisas waldᵾk, nᵾk mel, “Ik mbo wu ye! Moses nga mi ik ila ik ti, mon ropa pinditim ei ndi, nimba mel, ‘Wu ti ndi, amp tᵾpa mondpa, kangambuⱡa mi naimbᵾpa kuⱡangga kᵾn, wote ᵾngᵾn wu ti ndi, amp wiya ei, tᵾpa ᵾngᵾn nga koⱡ ila kangambuⱡa mendᵾmba,’ nᵾtᵾm. 29Kona tilinga, wu ᵾngᵾnᵾl 7 kat morung. Wu komun ei ndi, amp titim. Amp ei, kangambuⱡa mi naimbᵾpa, kurum. Wote, wu ᵾngᵾn ti ndi, amp wiya ei, tᵾpa kᵾn, kangambuⱡa mi naimbᵾpa, kurum. Wote, wu ᵾngᵾn merᵾng orunga ti ndi, i etpa amp ei titim. Wote, wu ᵾngᵾnᵾl 7 kᵾⱡ ndi pora, amp ei, tᵾk kapⱡa endᵾk kᵾn, kangambuⱡa mi naimbᵾk kolk pora ndurᵾng. 32Wote, akil tepa, amp wiya ni, kurum ku. 33Wu 7 kᵾⱡ ndi, amp ei, tᵾk mek andrᵾng. Ei nga wote, wamp korung mbᵾ, ⱡoprᵾk kont moⱡᵾng ui ei kᵾn, amp ei, wu nam nga moⱡmba nda?” nᵾtᵾng.

34Wote Jisas ndi, wu nimbᵾ, kundpa nimba mel, “Akup nga ui ila wamp kont molk kᵾn, wu amp nᵾk mormin. 35Wamp korung mbᵾ nga mat, Got ndi, muⱡ kona teing nimba pitim mbᵾ, wote ⱡoporpa kont mondum ei kᵾn, wu amp mel rᵾp rok, muⱡi nᵾmbᵾⱡing mon. 36Got ndi, wamp on kona mbila, ropa rut ndangga kᵾn, anggelo ralk, Got nga kangambuⱡa mel mbᵾ muⱡing. Wote aldpa, kuⱡi nᵾⱡing, mon. 37Wamp kui mbᵾ, ⱡoprᵾk kont muⱡing uⱡ ei nga, Moses ndi, tᵾn kᵾn nimba pora ndurum. Nde waⱡ kat ndip nurum ila, ik timan unt nga kᵾⱡ nga, Moses ndi, nimba mel, ‘Wu Nuim ei, Eiparam, Aisak, Jekop na kᵾⱡ nga Got ei!’ 38Wamp mbᵾ pora, Got elim nga kuimp keta ila kont mint muⱡing. Uⱡ ei nga, Got ei, wamp kui mbᵾ nga Got ti, mon!” nitim. 39Wote, Jisas nga ik nitim nimbᵾ, mi ik mbo wu mat ndi, punt rok, nᵾk mel, “Ik mbo wu ye! Nim ik kai mat punt ron ei ka!” nᵾtᵾng. Wote wu nimbᵾ ndi, Jisas murum nila mundmong endᵾk, ik mat waldᵾk ni nandᵾtᵾng.

Kraist Ei Wu Nam Nga Kangᵾm?

41Wote Jisas ndi, Perisi wu mbᵾ, kundpa nimba mel, “Nambuⱡ emel, wamp mbᵾ ndi, Got nga ngurum wu Kraist ei kundᵾk, Depit kangᵾm nᵾtmin nda? 42Buk Sam ila, Depit elim ndi, nimba mel,

‘Oⱡa Nuim ei ndi, Na nga Nuim ei kundpa, Na nga ki mbo orunga okᵾn muⱡana, 43Na ndi, nim nga el puⱡa wamp mbᵾ, tᵾp nim nga kᵾmp mundin ei nga, nde pol mel indimp,’ nitim.

44Depit elim ndi, Kraist nga nindpa kᵾn, elim nga Wu Nuim ei nitim. Ei nambuⱡ emel, wamp mbᵾ ndi, aldpa Kraist kundᵾk, Depit kangᵾm nᵾtmin nda?” nitim.

Mi Ik Mbo Wu Mbᵾ Nga Uⱡ Etᵾng Mbᵾ Mel

45Wamp mbᵾ ndi, Jisas ik nitim nimbᵾ, pilik moⱡᵾngina, Jisas ndi, elim nga kitip kᵾni wu ni kᵾⱡ, kundpa nimba mel, “Enim ndi, mi ik mbo wu mbᵾ nga pilik, tᵾk mendᵾk muⱡᵾi! Wu mbᵾ ndi, wal pᵾki roⱡ mbᵾ mint, numan ngᵾk pakᵾk andᵾk kᵾn, wamp mou rok molk etmin kona mbila, en enim tᵾk ou nduk, rawe etᵾk, numan ning ngᵾk pilik etmin. Wote, atinga manga kel mbila puk, nde pol kuimbal mbila, wamp kᵾnangina mint muⱡmin nᵾk pilik numan ngᵾk etmin. Wote, wamp rᵾng nok etmin mbila puk, nde pol kuimbal molk etmin. 47Wote, amp wiya mbᵾ tᵾk, wᵾlᵾ mundᵾk kᵾn, kng mel mbᵾ kindᵾp nok tᵾk, atinga ruⱡ wei mat, ik kol rok rormin ku. Got nga wamp kᵾmp tᵾmba ui ila, wu mbᵾ, mbun mindil mam mat ting,” nitim.